الركودة الصفراوية Schwangerschaftscholestase: أي حكة جديدة بالجسم خاصة براحة اليد وأخمص القدم بالثلث الأخير من الحمل لا يجب اهمالها ويجب نفي الركودة الصفراوية. شو يعني ركودة صفراوية؟ الكبد بالحالة الطبيعية بيفرز أملاح صفراوية بتروح عن طريق المرارة للأمعاء مشان تهضم الشحوم، الركودة بالحالة العادية الها اسباب كتيرة منها حصيات المرارة أو تضيقات بالطرق الناقلة. خلال الحمل الاسباب مو كتيرة واضحة منها حساسية بعض النساء للكميات العالية من الهرمونات، فبتصير ركودة بالمرارة وهالشي بيخلي الدم يمتص كميات كبيرة من الاملاح الصفراوية وبتصير عند الحامل اعراض اهمها الحكة خاصة براحة اليد واخمص القدم مع/ أو دون لعية نفس واقياء ووجع بطن بالقسم الأعلى والأيمن وتعب ب٢٥ بالمية من الحالات بتترافق كمان مع يرقان. ☆ شو هي مخاطر الركودة الصفراوية؟ بالنسبة للأم مافي أي مخاطر بس الحكة بتكون مزعجة وفيها تاخد حبوب أو مراهم ضد الحكة، والأعراض بتختفي بعد الولادة. بالنسبة للجنين وهي الأهم: ولادة مبكرة وموت الجنين ( هديك السنة اجت لعنا وحدة حامل بالاسبوع ٣٩ والجنين ميت ببطنا بسبب اهمال الركودة الصفراوية، طبعا هي كانت حامل بصبي بعد خمس بنات وهي من مجتمعاتنا الشرقية، يعني فيكن تتخيلو قساوة الموقف) لهيك أي حكة بتصير عندك لازم تشوفي دكتورتك حتى تسحبلك دم وتتأكد انو ماعندك ياها، واذا كانت النتيجة طبيعية فهاد ما بينفي الركودة اذا كانت متشكلة عن جديد ولازم بعد فترة اعادة التحاليل اذا استمرت الاعراض، وفي ادوية معينة بنعطيها للمريضة بتخفف من نسبة الولادة المبكرة وموت الجنين، وكمان اعتمادا على نتيجة التحاليل وكمية الاملاح الصفراوية بالدم وتخطيط دقات قلب الجنين والدوبلر احتمال نضطر نخلي المريضة كم يوم بالمشفى تحت المراقبة أو نلجأ الى التحريض أو القيصرية المستعجلة. ______________ ودمتم سالمين