الشهر السابع (الأسابيع من 27-30) هو بداية شهور نهاية الحمل، وممكن يبقى الشهر الأخير فعلاً لو حصلت ولادة مبكرة، وبيكون الجنين فيه شبه مكتمل وجاهز إلى حد كبير للحياة خارج الرحم والتأقلم على البيئة الخارجية.. . 👶 تطور الجنين في الشهر السابع: الجنين في الشهر السابع بيوصل وزنه تقريباً لـ 1.5 كجم، وطوله بيقرب لـ 40 سم، وأهم التغيرات اللي بتحصله في الشهر ده بتكون: ◼ حاسة السمع بتتطور بشكل كبير جداً في الشهر السابع ◼ مساحة الحركة جوا الرحم بتقل مع نمو الجنين علشان كدا بتلاحظ الأم اختلاف في حركة الطفل مع بداية الشهر السابع (بتبقى الحركة أعنف وأبطأ من المعتاد) ◼ وضعية الجنين جوا الرحم بتتغير أكتر من مره خلال الشهر واستجابته الحركية للمؤثرات الخارجية زي الصوت والإضاءة بتبقى أوضح ◼ في نهاية الشهر السابع الجنين بيغير وضعه جوا الرحم وراسه بتنزل لتحت استعداداً للولادة ◼ الطفل بيبلع السائل الجنيني (الأمنيوزي) اللي بيملى تجويف الرحم حواليه، ومع تطور حاسة التذوق بيبدأ الجنين يستطعم السائل ده، ومن المعلومات اللطيفة إن الأطعمة اللي بتاكلها الأم بتغير طعم السائل الأمنيوزي حسب نوعها، والطفل بالتالي بيتعود على طعم الأكلات والأصناف دي، فلما يبدأ الطفل ياكل مع الفطام (في عمر 6 شهور) بيقبل الأكلات والأطعمة اللي كانت أمه بتاكلها أثناء الشهور الأخيرة من الحمل أسرع من غيرها . 🚺 أعراض الشهر السابع: من الشهر السابع بتبدأ متاعب نهاية الحمل زي صعوبة التنفس خصوصاً أثناء النوم وصعوبة الحركة مع زيادة حجم ووزن البطن، ومشاكل الحموضة وزيادة عدد مرات التبول والإصابة بالإمساك والتعرض لنوبات زيادة في درجة حرارة الجسم وتقلب المزاج والعصبية الزايدة وغيرها.. تورم الأطراف (الإيدين والقدمين) بيزيد كمان مع ضغط الرحم على أوردة الحوض وكمان بسبب تأثير المستويات العالية لهرمونات الحمل على الأوعية والشعيرات الدموية الطرفية، وممكن مع ده تظهر أعراض زي تنميل الرسغ وأصابع الكفين بسبب ضغط على عصب الكف (متلازمة النفق الرسغي).. أهم الأعراض اللي لازم الحامل تاخد بالها منها أعراض الولادة المبكرة، زي: ⭕ حدوث تقلصات أو انقباضات رحمية بمعدل كبير (أكتر من 5 تقلصات في الساعة) ⭕ آلام مستمرة أسفل الظهر ⭕ آلام أثناء التبول والشعور بالضغط المتزايد على الحوض ⭕ نزول دم أحمر فاتح من المهبل . 💡 نصائح وتوجيهات: اهتمام الحامل بالتغذية السليمة أهم حاجة لازم تعملها في الشهر السابع والشهور الأخيرة من الحمل كلها، خصوصاً مع النمو المتزايد للجنين والصعوبات اللي بتقابلها في الأكل بسبب الحموضة ومشاكل المعدة، وكمان علشان جسمها يتحضر للولادة والرضاعة بعد كدا، ومهم الأم تختار أصناف الأطعمة اللي هتفيد طفلها مستقبلاً علشان الطفل بيقدر يدوق الأكل اللي الأم بتاكله إلى حد ما زي ما وضحنا قبل كدا.. متابعة الأم لحركة الجنين مهمة لأنها بتبدأ تتغير من الشهر السابع، والطبيعي إن الأم تحس بالحركة 10 مرات على الأقل كل ساعتين (او 3 مرات كل نص ساعة) لازم الأم كمان تبلغ طبيبها فوراً لو اتعرضت لأي أعراض ولادة مبكرة، وكتير بننصح الأم الحامل تتابع مع الدكتور كل 4 أسابيع على الأكثر من بداية الشهر السابع وأحياناً بيكون مفيد إن الأم تعمل بعض التحاليل الروتينية زي نسبة الهيموجلوبين وتحليل البول علشان نطمن إن ما فيش أنيميا أو التهابات في مجرى البول أو القناة التناسلية لا قدر الله.. لو فى السابع. اكتبي الحمد لله عشان فيه معلومه اكتر بكتير عن السابع ❤